ಗೋವಾದಲ್ಲಿ ಹೊನ್ನಾವರದ ಶೀಲಾ ಮೇಸ್ತರ ಅಭೂತಪೂರ್ವ ಸಾಧನೆ

ಗೋವಾದ ಪ್ರದೀಪ್ ಎಂಬುವರ ಜೊತೆಗೆ ಮದುವೆಯಾದ ಬಳಿಕ ಗೋವಾ ನಿವಾಸಿಯಾದರೂ ಶೀಲಾ ಮೇಸ್ತ ಕನ್ನಡತನವನ್ನು ಬಿಟ್ಟುಕೊಡಲಿಲ್ಲ ಕೊಂಕಣಿ ಆಡಳಿತ ಭಾಷೆಯಾಗಿರುವ ಗೋವಾದಲ್ಲಿ ಕನ್ನಡ ಕಾರ್ಯಕ್ರಮಗಳು ನಡೆಯುವುದು ಅಪರೂಪವಾಗಿತ್ತು.ಈ ಕಾರ್ಯಕ್ರಮಗಳನ್ನು ನಿರೂಪಿಸುವ ಅವಕಾಶಗಳು ದುರ್ಲಭವಾಗಿತ್ತು ಆದರೂ ಎಲ್ಲಾ ಸವಾಲುಗಳನ್ನು ಎದುರಿಸಿ ಶೀಲಾ ಮೇಸ್ತ ತನ್ನ ಪ್ರತಿಭೆ, ಅವಿರತ ಪ್ರಯತ್ನಗಳಿಂದ ಗೋವಾದಲ್ಲಿ ಕನ್ನಡ ಕಾರ್ಯಕ್ರಮಗಳನ್ನು ನಿರೂಪಿಸುವ ಅವಕಾಶಗಳನ್ನು ಪಡೆದುಕೊಂಡರು ಅದ್ದೂರಿ ಮತ್ತು ಅತ್ಯಂತ ಮಹತ್ವದ ಕಾರ್ಯಕ್ರಮಗಳನ್ನು ನಿರೂಪಿಸುವ ನಿರಂತರ ಅವಕಾಶಗಳು ಶೀಲಾ ಮೇಸ್ತರಿಗೆ ಒದಗಿ ಬಂದವು. ಅದರೊಂದಿಗೆ ಕೊಂಕಣಿ ಮತ್ತು ಹಿಂದಿ ಕಾರ್ಯಕ್ರಮಗಳನ್ನು ನಿರೂಪಿಸುವ ಅವಕಾಶಗಳು ಪ್ರಾಪ್ತಿಯಾದವು.

ಪ್ರಾರಂಭಿಕ ಹಂತದ ಕಠಿಣವಾದ ಹಾದಿಯನ್ನು ದಾಟಿ, ನಿರೂಪಣಾ ಕ್ಷೇತ್ರದಲ್ಲಿನ ಅಗಾಧ ಅನುಭವ, ನಿರೂಪಣಾ ತಂತ್ರಗಾರಿಕೆಯಿಂದ ಅತ್ಯಂತ ಸುಲಲಿತವಾಗಿ ಮತ್ತು ಯಶಸ್ವಿಯಾಗಿ ಕಾರ್ಯಕ್ರಮಗಳನ್ನು ಶೀಲಾರವರು ನಡೆಸಿಕೊಡುತ್ತಿರುವುದರಿಂದ ಗೋವಾದ ಅನುಶ್ರೀ ಎಂಬ ಪ್ರಶಂಸೆಗೆ ಪಾತ್ರರಾಗಿದ್ದಾರೆ. ಗೋವಾದಲ್ಲಿ ಇಂದು ಯಾವುದೇ ಕಾರ್ಯಕ್ರಮ ನಡೆದರೂ ಅಲ್ಲಿ ಶೀಲಾ ಮೇಸ್ತರವರ ನಿರೂಪಣೆಯ ಉಪಸ್ಥಿತಿ ಇರುತ್ತದೆ. ಅಷ್ಟರ ಮಟ್ಟಿಗೆ ಶೀಲಾ ಮೇಸ್ತರವರ ನಿರೂಪಣಾ ಪ್ರತಿಭೆ ಜನಪ್ರಿಯವಾಗಿದೆ ನಾಡೋಜ ಮಹೇಶ್ ಜೋಷಿ, ಗೋವಾದ ರಾಜಕೀಯ ವ್ಯಕ್ತಿಗಳು ಸೇರಿದಂತೆ ಅನೇಕ ಗಣ್ಯಮಾನ್ಯರು ಶೀಲಾರವರ ನಿರೂಪಣಾ ಪ್ರತಿಭೆಯನ್ನು ಶ್ಲಾಘಿಸಿದ್ದಾರೆ. ಗೋವಾದ ಬಿಡುವಿಲ್ಲದ ಕಾರ್ಯಕ್ರಮಗಳ ನಡುವೆಯೂ ಅವರು ತವರಾದ ಉತ್ತರ ಕನ್ನಡ ಜಿಲ್ಲೆಯಲ್ಲೂ ಕಾರ್ಯಕ್ರಮಗಳ ನಿರೂಪಣೆಗೆ ಆಗಮಿಸುತ್ತಾರೆ.

ತನ್ನ ತವರು ನೆಲ ಕಾಸರಕೋಡು ಟೊಂಕದಲ್ಲಿ ಖಾಸಗಿ ವಾಣಿಜ್ಯ ಬಂದರು ನಿರ್ಮಾಣ ಕಾಮಗಾರಿಯನ್ನು ವಿರೋಧಿಸಿ ಶೀಲಾರವರು ತನ್ನ ಯೂಟ್ಯೂಬ್ ಚಾನಲ್ ನಲ್ಲಿ ಮೀನುಗಾರರಿಗೆ ಆಗುತ್ತಿರುವ ಅನ್ಯಾಯದ ವಿರುದ್ಧ ಎಳೆ ಎಳೆಯಾಗಿ ವಾಸ್ತವತೆಯನ್ನು ಬಿತ್ತರಿಸಿ ತನ್ನ ಸಾಮಾಜಿಕ ಬದ್ಧತೆಯನ್ನು ಮೆರೆದಿದ್ದರು. ಕತ್ತಲೆಯಲ್ಲಿ ಹೂತಿಟ್ಟ ಧಿಕ್ಕಾರದ ದ್ವನಿಗಳಿಗೆ ಜೀವ ತುಂಬಿದ ಶೀಲಾರವರು ಮೀನುಗಾರರ ಹೋರಾಟಕ್ಕೆ ಬೆನ್ನುಲುಬಾಗಿ ನಿಂತಿದ್ದರು. ಅವರ ಮಧುರ ಸಿರಿಕಂಠ ಸವಿ ಸೊಬಗಿನ ರಸಾಯನವಾಗಿದ್ದು, ವಿಷಯವನ್ನು ಪ್ರಸ್ತುತಪಡಿಸುವ ಶೈಲಿ, ಪದಗಳ ಸ್ಪಷ್ಟತೆ, ನಿರರ್ಗಳ ಮಾತುಗಾರಿಕೆ, ಸಾಂದರ್ಭಿಕ ಸನ್ನಿವೇಶಗಳಿಗೆ ತಕ್ಕಂತೆ ಚಿಂತಕರ, ಶ್ರೇಷ್ಠ ಮಹನೀಯರ ನುಡಿಮುತ್ತುಗಳನ್ನು ಪೋಣಿಸಿ ಕಟ್ಟುವ ಪದಲಾಲಿತ್ಯದ ಮಾತಿನ ಮಂಟಪ ನಿಜಕ್ಕೂ ಅದ್ಬುತ ಗೋವಾದ ಕನ್ನಡ ಸಂಘ ಸೇರಿದಂತೆ ಹತ್ತು ಹಲವು ಸಂಘಟನೆಗಳಿಂದ ಸನ್ಮಾನ ಗೌರವಗಳಿಗೆ ಪಾತ್ರವಾಗಿರುವ ಶೀಲಾ ಮೇಸ್ತರಿಗೆ ಪತಿಯಾದ ಪ್ರದೀಪ್ ರವರ ಬೆಂಬಲ ಮತ್ತು ಮಗಳಾದ ಸ್ತುತಿಯ ಸ್ಪೂರ್ತಿ ಇದೆ.