ಚೆಂಡೆಯ ಕಲರವದಲ್ಲಿ ಕಂಗೊಳಿಸುತ್ತಿರುವ ಶ್ರೀ ಮಹಾಕಾಳಿ ಚೆಂಡೆ ಬಳಗ

ಚೆಂಡೆ ಬಳಗದ ಕಲಾವಿದರು ಹೊರಹೊಮ್ಮಿಸುವ ಚೆಂಡೆ ನಿನಾದ ಅವರ ಕರದಿಂದ ಮಧುರ ದ್ವನಿತರಂಗ ಹೊರಡಿಸುವ ತಾಳಗಳ ಸದ್ದು, ಹಾಕುವ ಹೆಜ್ಜೆಯ ಆಕರ್ಷಕ ನೋಟ ನೋಡುಗರ ಪ್ರಶಂಸೆಗೆ ಪಾತ್ರವಾಗಿದೆ. ಇಂದು ಚೆಂಡೆ ವಾದನ ಜನಪ್ರಿಯವಾಗಿದ್ದು,ದೇವಸ್ಥಾನಗಳ ಹಬ್ಬ ಹರಿದಿನ ಉತ್ಸವಗಳಲ್ಲಿ, ಕಾರ್ಪೊರೇಟ್ ಕಂಪನಿಗಳ ಕಾರ್ಯಕ್ರಮಗಳಲ್ಲಿ,ಈವಿಂಟ್ ಮ್ಯಾನೇಜ್ಮೆಂಟ್ ಕಾರ್ಯಕ್ರಮಗಳಲ್ಲಿ, ರಾಜಕೀಯ ಕಾರ್ಯಕ್ರಮಗಳಲ್ಲಿ, ಸಂಘ ಸಂಸ್ಥೆಗಳ ಕಾರ್ಯಕ್ರಮಗಳಲ್ಲಿ ಚೆಂಡೆ ವಾದನ ಬೇಡಿಕೆ ಪಡೆದುಕೊಂಡಿದೆ. ಮೂಲತಃ ಕೇರಳ ರಾಜ್ಯದ ಧಾರ್ಮಿಕ ಸಂಸ್ಕೃತಿಯಲ್ಲಿ ಪ್ರಾಮುಖ್ಯತೆ ಪಡೆದಿರುವ ಚೆಂಡೆ ವಾದನ ಕಲಿಕೆ ಸುಲಭದಲ್ಲಿ ಕೈಗೂಡುವ ಕಲೆಯಲ್ಲ. ಅದಕ್ಕೆ ತನ್ನದೇ ಆದ ಕಲಿಕಾ ವಿಧಾನಗಳಿವೆ. ಶ್ರೇಷ್ಠತೆಯ ಸಂಸ್ಕಾರವಿದೆ. ಶಿಕ್ಷಣಾರ್ಥಿಗಳಿಗೆ ಆರಂಭದಲ್ಲಿ ನೆಲದ ಮೇಲೆ ಕುಳಿತು ಮಣೆ, ಗ್ರಾನೈಟ್ ಕಲ್ಲುಗಳು, ಸಪಟಾದ ಶಿಲೆಕಲ್ಲುಗಳ ಮೇಲೆ ಲಯಬದ್ದವಾಗಿ ಬಾರಿಸಲು ಕಲಿಸುತ್ತಾರೆ. ಇದು ಆರು ತಿಂಗಳ ತರಬೇತಿ. ಇದರಲ್ಲಿ ಪಳಗಿದ ಬಳಿಕವಷ್ಟೇ ಮುಂದಿನ ಹಂತವಾಗಿ ಚೆಂಡೆ ಕಲಿಕೆಯ ಆರು ತಿಂಗಳ ತರಬೇತಿ. ಶಿಲೆಕಲ್ಲು,ಗ್ರ್ಯಾನೆಟ್ ಕಲ್ಲು, ಮತ್ತು ಮಣೆಗಳ ಮೇಲೆ ಬಲ ಕೈಯಲ್ಲಿ ಹುಣೆಸೆಮರದ ಕೋಲಿನಿಂದ ಬಾರಿಸಬೇಕು. ಇಲ್ಲಿ ಎಡ ಕೈಗಳಿಗೆ ನೇರವಾಗಿ ಕಲ್ಲು ಮಣೆಗಳ ಮೇಲೆ ಬಡಿಯುವ ಪ್ರಯಾಸಕರ ಕೆಲಸ. ಎಡಗೈ ಈ ಸಂದರ್ಭದಲ್ಲಿ ತುಂಬಾ ನೋವು ಅನುಭವಿಸುತ್ತದೆ.

ಈ ಕಠಿಣ ತರಬೇತಿಯನ್ನು ಯಶಸ್ವಿಯಾಗಿ ಪೂರೈಸಿದರೆ ಮಾತ್ರ ಸಾರ್ವಜನಿಕವಾಗಿ ಚೆಂಡೆ ಬಾರಿಸುವ ಅವಕಾಶ ದೊರಕುತ್ತದೆ.ಸಾಮಾನ್ಯವಾಗಿ ಚೆಂಡೆ ವಾದಕರು ಕೇರಳದಲ್ಲಿ ಚೆಂಡೆ ವಾದನ ತರಬೇತಿ ಪಡೆಯುತ್ತಾರೆ. ಅಲ್ಲಿ ಹಲವಾರು ತರಬೇತಿ ಕೇಂದ್ರಗಳಿವೆ. ಹಲವು ಪ್ರಕಾರದ ಚೆಂಡೆ ಕಲಿಕಾ ವಿಧಾನಗಳಿವೆ. ಅಚ್ಚರಿಯ ವಿಷಯವೆಂದರೆ, ಮಹಾಕಾಳಿ ಚೆಂಡೆ ಬಳಗದ ಕಲಾವಿದರು ಅಪೂರ್ವ ಛಲ ಕಠಿಣ ಪರಿಶ್ರಮದಿಂದ ಚೆಂಡೆ ವಾದನವನ್ನು ಸ್ವಯಂ ಕಲಿತು ಜನಮೆಚ್ಚುಗೆ ಗಳಿಸಿದ್ದಾರೆ. ನಿರಂತರ ಅಭ್ಯಾಸ, ಶ್ರದ್ಧೆ, ಏಕಾಗ್ರತೆ ಕಲಿಕೆಯ ತುಡಿತದಿಂದ ಚೆಂಡೆ ವಾದನದಲ್ಲಿ ಪರಿಪಕ್ವರಾಗಿದ್ದಾರೆ. ಇದಕ್ಕೆ ಶ್ರೀ ಮಹಾಕಾಳಿ ಅಮ್ಮನವರ ಕೃಪಾರ್ಶೀವಾದವೂ ಲಭಿಸಿತು ಎಂದು ಚೆಂಡೆ ಕಲಾವಿದರು ಸ್ಮರಿಸಿಕೊಳ್ಳುತ್ತಾರೆ.

ಮನುಕುಲಕ್ಕೆ ಪರಮಾತ್ಮನು ಕರುಣಿಸಿರುವ ವರಪ್ರಸಾದವೇ ಸಂಗೀತ. ಸಂಗೀತವು ದೈವಕೃಪೆ. ಪರಶಿವನು ಡಮರುಗ ನುಡಿಸುತ್ತಾನೆ. ಶ್ರೀ ಕೃಷ್ಣನು ಕೊಳಲನ್ನೂದುತ್ತಾನೆ. ದೇವಾನುದೇವತೆಗಳು ಸಂಗೀತ ಪ್ರಿಯರು.ಪ್ರಪಂಚದಲ್ಲೇ ಅತೀ ಹೆಚ್ಚಿನ ಸಂಖ್ಯೆಯ ಸಂಗೀತ ವಾದ್ಯಗಳು ಹೊಂದಿರುವ ದೇಶ ಭಾರತ. ಪ್ರತ್ಯೇಕವಾದ ಹೆಸರುಳ್ಳ ಐನೂರಕ್ಕೂ ಹೆಚ್ಚು ಸಂಗೀತ ವಾದ್ಯಗಳು ಭಾರತದಲ್ಲಿದೆ. ವಿವಿಧ ತೆರನಾದ ವಾದ್ಯಗಳು ರಚನೆಯಲ್ಲಿ, ಆಕಾರದಲ್ಲಿ ದ್ವನಿಮಾಧುರ್ಯಗಳಲ್ಲಿ ತಮ್ಮದೇ ಆದ ವೈಶಿಷ್ಟ್ಯತೆಗಳನ್ನು ಹೊಂದಿವೆ. ದ್ವನಿಮಾಧುರ್ಯಗಳ ಸಂಕ್ಷಿಪ್ತ ವರ್ಗೀಕರಣದಂತೆ ವಾದ್ಯಗಳನ್ನು ಮುಖ್ಯವಾಗಿ ನಾಲ್ಕುವಿಧಗಳಾಗಿ ವಿಂಗಡಿಸಲಾಗಿದೆ.