ಅಪಾಯ ಲೆಕ್ಕಿಸದೆ ಮುಳುಗುತ್ತಿರುವವರ ರಕ್ಷಿಸುವ ಆಪತ್ಬಾಂಧವ ಹರ್ಷಿತ್ ಖಾರ್ವಿ

ಹರ್ಷಿತ್ ರವರ ಈಜು ಪರಿಣಿತಿಯ ಸಾಧನೆ ಮೊತ್ತಮೊದಲು 2007 ರಲ್ಲಿ ಜಗತ್ತಿನ ಮುಂದೆ ಅನಾವರಣಗೊಂಡಿತು ಹರ್ಷಿತ್ ಹದಿಮೂರು ವರ್ಷದ ಬಾಲಕನಾಗಿದ್ದಾಗ ಕೈಕಾಲುಗಳಿಗೆ ಸಂಕೋಲೆ ಕಟ್ಟಿಕೊಂಡು ಗಂಗೊಳ್ಳಿ ಲೈಟ್ ಹೌಸ್ ಸಮುದ್ರತೀರದಿಂದ ಕುಂದಾಪುರ ಸಂಗಮ್ ತನಕ ಸಮುದ್ರ ಮತ್ತು ಪಂಚಗಂಗಾವಳಿ ನದಿಯಲ್ಲಿ ಈಜಿ ಅಭೂತಪೂರ್ವ ಸಾಧನೆಗೈದರು. ಇದು ಈಜುವಿಕೆಯಲ್ಲಿ ಹೊಸ ಇತಿಹಾಸವನ್ನು ಸೃಷ್ಟಿಸಿದ ಅದ್ಬುತ ದಾಖಲೆ. ಕೇವಲ ಹದಿಮೂರು ವರ್ಷದ ಎಳೆಬಾಲಕನೊಬ್ಬನ ಈ ಅಭೂತಪೂರ್ವ ಸಾಧನೆಗೆ ಜನ ದಂಗಾದರು. ಗಂಗೊಳ್ಳಿ ಸಮುದ್ರದಿಂದ ಕುಂದಾಪುರ ಸಂಗಮ್ ತನಕ ಪಂಚಗಂಗಾವಳಿ ನದಿಯಲ್ಲಿ ಸುಮಾರು 25 ಕೀ ಮೀ ದೂರ ಕೈಕಾಲು ಕಟ್ಟಿಕೊಂಡು ಈಜಿದ ಹರ್ಷಿತ್ ಸಾಧನೆ zee ರಾಷ್ಟ್ರೀಯ ವಾಹಿನಿಯ ಶಹಬ್ಬಾಸ್ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ನಲ್ಲಿ ದಾಖಲಾಗುವ ಮೂಲಕ ಕುಂದಾಪುರದ ಕೀರ್ತಿ ಬೆಳಗಿತು. ಹರ್ಷಿತ್ ಈಜುವಿಕೆ ಕಾರ್ಯಕ್ರಮದುದ್ದಕ್ಕೂ ಗಂಗೊಳ್ಳಿ ಸಮುದ್ರ ತೀರದಿಂದ ಕುಂದಾಪುರ ಪಂಚಗಂಗಾವಳಿ ತೀರದುದ್ದಕ್ಕೂ ಶಹಬ್ಬಾಸ್ ಇಂಡಿಯಾ ಬುಕ್ ಆಫ್ ರೆಕಾರ್ಡ್ ಸದಸ್ಯರು ಈ ಅಭೂತಪೂರ್ವ ದೃಶ್ಯಾವಳಿಗಳನ್ನು ಸೆರೆಹಿಡಿದಿದ್ದರು.ಅದು zee ರಾಷ್ಟ್ರೀಯ ವಾಹಿನಿಯಲ್ಲಿ ಪ್ರಸಾರಗೊಂಡು ಅಪಾರ ಜನಮನ್ನಣೆಗಳಿಸಿತ್ತು ಎಂಬುದನ್ನು ಇಲ್ಲಿ ಬಹಳ ಹೆಮ್ಮೆಯಿಂದ ಸ್ಮರಿಸಿಕೊಳ್ಳಬಹುದಾಗಿದೆ.

ಸಮುದ್ರದ ರೌದ್ರರೂಪದ ತೆರೆಗಳನ್ನು ಕಂಡರೆ ಭಯವಾಗುತ್ತದೆ.ಅಂತಹದುರಲ್ಲಿ ಎಳೆ ಬಾಲಕನೊಬ್ಬ ಕೈಕಾಲುಗಳಿಗೆ ಸಂಕೋಲೆಗಳನ್ನು ಕಟ್ಟಿಕೊಂಡು ಸಮುದ್ರದಲ್ಲಿ ಮೈಲುಗಟ್ಟಲೆ ಈಜುವುದೆಂದರೆ ಸಾಮಾನ್ಯದ ಮಾತಲ್ಲ. ಇವರ ಸೋದರ ಮಾವ ದಯಾನಂದ ಕುಡ್ತೋಲ್ ಕಾರ್ ರವರು ಕೂಡಾ ಪ್ರಸಿದ್ಧ ಈಜುಪಟುವಾಗಿದ್ದು, ಗಂಗೊಳ್ಳಿ ಬಂದರಿನಿಂದ ಮಂಗಳೂರಿನ ಹಳೆ ಬಂದರಿನ ತನಕ ಸುಮಾರು 150 ಕೀಮೀ ಈಜಿ ಸಾಧನೆ ಮಾಡಿದ ದಾಖಲೆ ಇದೆ. ಹರ್ಷಿತ್ ಸಾಧನೆಯನ್ನು ಗುರುತಿಸಿ ಕುಂದಾಪುರ ಶ್ರೀ ಮಹಾಕಾಳಿ ದೇವಸ್ಥಾನ, ವಿದ್ಯಾರಂಗ ಮಿತ್ರಮಂಡಳಿ ಖಾರ್ವಿಕೇರಿ ಕುಂದಾಪುರ, ಸಾರ್ವಜನಿಕ ಗಣೇಶೋತ್ಸವ ಸಮಿತಿ ಬೆಂಗರೆ, ಮಂಗಳೂರು ಕೊಂಕಣಿ ಸಾಹಿತ್ಯ ಅಕಾಡೆಮಿ, ಭಟ್ಕಳ ಕೊಂಕಣಿ ಸಾಹಿತ್ಯ ಅಕಾಡೆಮಿ, ಜಿ ಪಂ ಹಿ ಪ್ರಾ ಶಾಲೆ ಗಂಗೊಳ್ಳಿ, ಕೊಂಕಣಿ ಖಾರ್ವಿ ಮಹಾಸಭಾ ಬೆಂಗ್ರೆ ಮಂಗಳೂರು, ಕೊಂಕಣಿ ಖಾರ್ವಿ ಸಮಾಜ ಗಂಗೊಳ್ಳಿ, ಕುಂದಾಪುರ ಜೇಸಿಸ್, ಅಖಿಲ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಮುಂತಾದ ಸಂಘ ಸಂಸ್ಥೆಗಳು ಗೌರವಿಸಿ ಪ್ರಶಸ್ತಿ ನೀಡಿ ಸನ್ಮಾನಿಸಿದ್ದಾರೆ.