ಮಡಿ ಮೀನುಗಾರಿಕೆ ಎಂಬ ಕೌತುಕ ಸಂಭ್ರಮ

ಇಲ್ಲಿ ತೆರೆದ ಭೂಶಿರ ಪ್ರದೇಶವಿಲ್ಲ ಪ್ರಾಕೃತಿಕ ಶಿಲಾಬಂಡೆಗಳಿವೆ ಸಹಸ್ರಾರು ವರ್ಷಗಳ ಹಿಂದೆ ಜ್ವಾಲಾಮುಖಿಯಿಂದ ಮೇಲೆದ್ದು ಬಂದ ಅಗ್ನಿಶಿಲೆಗಳು ಇಲ್ಲಿ ಬಂಡೆಗಳಾಗಿ ರೂಪಾಂತರಗೊಂಡಿವೆ ಕಡಲಿನ ಅಲೆಗಳು ವಿಭಿನ್ನಕೋನದಲ್ಲಿ ಕಡಲತೀರಕ್ಕೆ ಬಡಿಯುತ್ತದೆ ಹಾಗೆ ಬಡಿದಾಗ ಮರಳು ಕಡಲತೀರದುದ್ದಕ್ಕೂ ಚಲಿಸುತ್ತದೆ ಇದು ಕಡಲತೀರದ ವಿಮುಖ ಪಥಚ್ಯುತಿ ಎಂದು ಕರೆಯಲ್ಪಡುತ್ತದೆ. ಸಾಗರವೆಲ್ಲವೂ ಸದಾ ಕಾಲದಲ್ಲೂ ತುದಿಯಿಂದ ಬುಡದವರೆಗೆ ದಿನ ಒಂದಕ್ಕೆ ಅಂಗುಲದ ಒಂದು ಭಾಗದಷ್ಟು ತಿರುಗುತ್ತಿದೆಯೆಂದು ವಿಜ್ಞಾನಿಗಳ ಅಧ್ಯಯನ ತಿಳಿಸಿದೆ. ಮೇಲ್ಭಾಗದ ನೀರು ಆಮ್ಲಜನಕವನ್ನು ಕರಗಿಸಿಕೊಳ್ಳುತ್ತದೆಯೆಂದೂ, ಅದು ಮುಳುಗುತ್ತಾ ಹೋದಂತೆ ಅದನ್ನು ಕಳೆದುಕೊಳ್ಳುತ್ತದೆಯೆಂದು ವಿಜ್ಞಾನಿಗಳ ಅಭಿಮತ. ಇದೇ ಸಂದರ್ಭದಲ್ಲಿ ವಾತಾವರಣದಲ್ಲಿನ ಹೆಚ್ಚಳಗೊಂಡ ಇಂಗಾಲದ ಡೈ ಆಕ್ಸೈಡ್ ಅನ್ನು ಸಮುದ್ರಗಳಲ್ಲಿನ ಕಾರ್ಬೋನೇಟ್ ವ್ಯವಸ್ಥೆಗಳು ಹೀರಿಕೊಳ್ಳುತ್ತವೆ.

ಮಳೆಗಾಲದಲ್ಲಿ ಯಾಂತ್ರಿಕ ದೋಣಿಗಳ ಮೀನುಗಾರಿಕೆಗೆ ನಿಷೇಧವಿರುತ್ತದೆ. ಈ ಸಮಯದಲ್ಲಿ ಸಾಂಪ್ರದಾಯಿಕ ದೋಣಿಗಳಗಷ್ಟೇ ಅವಕಾಶವಿರುತ್ತದೆ. ಉದರ ಪೋಷಣೆಗಾಗಿ ಸಾಂಪ್ರದಾಯಿಕ ಮೀನುಗಾರರು ಕಡಲು ಶಾಂತವಾಗುವುದನ್ನೇ ಕಾಯುತ್ತಿರುತ್ತಾರೆ. ಸಾಮಾನ್ಯವಾಗಿ ಜುಲೈ ತಿಂಗಳ ಕೊನೆಯ ವಾರದಲ್ಲಿ ಮಡಿ ಕಡಲತೀರದಲ್ಲಿ ಮಡಿ ಬೀಳುತ್ತದೆ. ಈ ಶುಭ ಸಂದರ್ಭಕ್ಕಾಗಿಯೇ ಕಡಲಮಕ್ಕಳು ಕಾತುರದಿಂದ ಕಾಯುತ್ತಿರುತ್ತಾರೆ. ಕಡಲು ಶಾಂತವಾಗಿ ಮೀನುಗಾರಿಕೆಗೆ ಅನುಕೂಲವಾಗುವ ಪ್ರಕ್ರಿಯೆಯನ್ನು ಮಡಿ ಬೀಳುವುದು ಎಂದು ಕರೆಯುತ್ತಾರೆ.

ಮಡಿ ಬೀಳುವ ಪ್ರಕ್ರಿಯೆ ಈ ಕಡಲತೀರದಲ್ಲಿ ಹಬ್ಬದ ಸಂಭ್ರಮ ಸೃಷ್ಟಿ ಮಾಡುತ್ತದೆ. ಇಲ್ಲಿ ನಿರಂತರ ಒಂದು ತಿಂಗಳು ಮೀನುಗಾರಿಕೆ ಚಟುವಟಿಕೆಗಳು ನಡೆಯುತ್ತದೆ. ಸಹಸ್ರಾರು ಮೀನುಗಾರರಿಗೆ ಉದರ ಪೋಷಣೆಯ ಕಾಯಕವಾದರೆ, ಈ ಉದ್ಯೋಗವನ್ನು ಅವಲಂಬಿಸಿದವರಿಗೆ ಮತ್ತುಅಪರೋಕ್ಷವಾಗಿ ನೂರಾರು ಜನರಿಗೆ ಉದ್ಯೋಗ ದೊರಕುತ್ತದೆ. ಚಾ ತಿಂಡಿ ಹೋಟೆಲ್ ಗಳು, ಊಟದ ಹೋಟೆಲ್ ಗಳು ಇಲ್ಲಿ ತಲೆಯೆತ್ತುತ್ತದೆ. ಕಡಲಮಕ್ಕಳ ಕಠಿಣ ಪರಿಶ್ರಮದ ಚಟುವಟಿಕೆಗಳು ಈ ಪರಿಸರವನ್ನು ಕ್ರಿಯಾಶೀಲವನ್ನಾಗಿ ಮಾಡುತ್ತದೆ. ಸಮುದ್ರ ಸೃಷ್ಟಿಸುವ ಅಭೂತಪೂರ್ವ ನೈಸರ್ಗಿಕ ವಿದ್ಯಮಾನಗಳು ಇಲ್ಲಿ ಕೌತುಕಪೂರ್ಣ ವಾತಾವರಣವನ್ನು ಸೃಷ್ಟಿಸುತ್ತದೆ .ಮಡಿ ಬೀಳುವ ಈ ವಿಶಿಷ್ಟ ಪ್ರಕ್ರಿಯೆ ಕೂತೂಹಲವನ್ನು ಉಂಟು ಮಾಡುತ್ತದೆ. ಪ್ರತಿವರ್ಷ ಜರುಗುವ ಈ ಪ್ರಕ್ರಿಯೆಯಲ್ಲಿ ಸಮೃದ್ಧ ಮೀನುಗಾರಿಕೆ ನಡೆಯುತ್ತದೆ ಕಡಲು ತಂಪಾದಂತೆ ಮೀನುಗಳು ತೀರ ಪ್ರದೇಶಕ್ಕೆ ಬರುತ್ತದೆ ಇಲ್ಲಿ ಮೀನುಗಾರಿಕೆ ನಡೆಸಲು ಮರವಂತೆ, ಕೋಡೇರಿ, ಕೋಡಿ, ಬೈಂದೂರು ಪ್ರದೇಶದಿಂದಲೂ ಮೀನುಗಾರರು ಆಗಮಿಸುತ್ತಾರೆ ಪ್ರಸ್ತುತ ಇಲ್ಲಿ ಮೂನ್ನೂರಕ್ಕೂ ಹೆಚ್ಚು ಸಾಂಪ್ರದಾಯಿಕ ನಾಡದೋಣಿಗಳು ಮತ್ತು ಪಾತಿದೋಣಿಗಳಲ್ಲಿ ಮೀನುಗಾರಿಕೆ ನಡೆಸುತ್ತಿದ್ದಾರೆ.