ಕುಂದಾಪುರ ಖಾರ್ವಿಕೇರಿಯ “ಶಬರಿಮಲೆ ಯಾತ್ರೆ” ನಡೆದು ಬಂದ ದಾರಿ

ದೇವರ ಸ್ವಂತ ನಾಡು ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿರುವ ಕೇರಳದ ಪತ್ತಂನತಿಟ್ಟ ಜಿಲ್ಲೆಯ ಪಶ್ಚಿಮ ಘಟ್ಟಗಳ ಶ್ರೇಣಿಯ ಹದಿನೆಂಟು ಬೆಟ್ಟಗಳ ನಡುವೆ ವಿರಾಜಮಾನವಾಗಿರುವ ಹರಿಹರ ಪುತ್ರನ ಪರಮಪವಿತ್ರ ಕ್ಷೇತ್ರವೇ ಶ್ರೀ ಕ್ಷೇತ್ರ ಶಬರಿಮಲೆ. ಭಕ್ತಿಯ ಪರಕಾಷ್ಠೆಯೊಂದಿಗೆ ಏಕತೆ ಸಹಬಾಳ್ವೆ ಸಾರುವ ಶಬರಿಮಲೆ ಯಾತ್ರೆ ಭಗವಂತನಲ್ಲಿ ತಮ್ಮನ್ನು ಸಮರ್ಪಿಸಿಕೊಳ್ಳುವ ಪುಣ್ಯಪ್ರದ ಯಾತ್ರೆ. ಶಬರಿಮಲೆಯ ಯಾತ್ರೆಯ ವೃತಾಚಾರಣೆ ವ್ಯಕ್ತಿಯನ್ನು ಭಕ್ತಿಯ ಮಾರ್ಗದರ್ಶನದಲ್ಲಿ ಸಜ್ಜನನನ್ನಾಗಿ ರೂಪಿಸುವ ಸದ್ದುದ್ದೇಶವನ್ನು ಹೊಂದಿರುತ್ತದೆ.

ಸ್ವಾಮಿ ಅಯ್ಯಪ್ಪನು ನೆಲೆ ನಿಂತ ಶಬರಿಮಲೆ ಕ್ಷೇತ್ರ ಕೋಟ್ಯಾಂತರ ಭಕ್ತರ ಶ್ರದ್ದಾ ಭಕ್ತಿಯ ಪರಮಪವಿತ್ರ ಸನ್ನಿಧಾನ. ಅಯ್ಯಪ್ಪ ದೇವರ ಆರಾಧನೆಯೊಂದಿಗೆ ಶಬರಿಮಲೆ ಕ್ಷೇತ್ರ ಕರ್ನಾಟಕದಲ್ಲಿ ಹೆಚ್ಚು ಪ್ರಚಾರಕ್ಕೆ ಬಂದಿದ್ದು ಎಂಬತ್ತರ ದಶಕದ ಪ್ರಥಮಾರ್ದದಲ್ಲಿ.ತಮಿಳುನಾಡಿನ ನಾಟಕ ಕಂಪನಿಯೊಂದು ಆ ಸಮಯದಲ್ಲಿ ಶಬರಿಮಲೆ ಅಯ್ಯಪ್ಪ ಎಂಬ ನಾಟಕವನ್ನು ಆಡುತ್ತಿತ್ತು.ಐತಿಹಾಸಿಕ ಮತ್ತು ಪೌರಾಣಿಕ ಹಿನ್ನೆಲೆಯ ಈ ನಾಟಕ ಕಂಪನಿ ಬೆಂಗಳೂರಿನಲ್ಲೂ ಪ್ರದರ್ಶನ ನೀಡಿ ಅಯ್ಯಪನ ಶಬರಿಮಲೆ ಸನ್ನಿಧಾನದ ಪರಿಚಯವನ್ನು ಜನರಿಗೆ ಪರಿಚಯಿಸಿತ್ತು.ಅದರ ಜೊತೆಗೆ ಮಂಗಳೂರಿನಲ್ಲಿ ನೆಲೆ ನಿಂತ ಕೇರಳದ ಮಲೆಯಾಳಿಗಳು ಅಯ್ಯಪ್ಪ ಮಾಲೆ ಧರಿಸಿ ತಾವು ಇದ್ದ ಪ್ರದೇಶದಲ್ಲಿ ಶಬರಿಮಲೆ ವೃತಾಚಾರಣೆ ಮಾಡತೊಡಗಿದರು.ಇದು ಕರ್ನಾಟಕದ ಭಕ್ತಾದಿಗಳನ್ನು ಆಕರ್ಷಿಸಲು ಹೆಚ್ಚು ಸಮಯ ಹಿಡಿಯಲಿಲ್ಲ.

ಸಹಸ್ರಾರು ಜನ ಅಯ್ಯಪ್ಪ ಮಾಲೆ ಧರಿಸಿ ಶಬರಿಮಲೆ ಯಾತ್ರೆ ಕೈಗೊಳ್ಳಲು ಪ್ರಾರಂಭಿಸಿದರು.ಹೀಗೆ ಲಕ್ಷೋಪಲಕ್ಷ ಜನ ಅಯ್ಯಪ್ಪನ ಭಕ್ತರಾದರು.ಹಲವಾರು ಪವಾಡ ಸೃದಸ್ಯ ಘಟನೆಗಳು ನಡೆದು ಕ್ಷಿಪ್ರಗತಿಯಲ್ಲಿ ಅಯ್ಯಪ್ಪ ಸ್ವಾಮಿ ಜಗತ್ಪ್ರಸಿದ್ಧನಾಗಲು ಕಾರಣವಾಯಿತು. ಇದೇ ಸಂದರ್ಭದಲ್ಲಿ ಶ್ರೀ ಅಯ್ಯಪ್ಪ ಸ್ವಾಮಿಯ ಆರಾಧನೆ ಶಬರಿಮಲೆ ಯಾತ್ರೆಯ ಹೆಜ್ಜೆಗಳು ಕುಂದಾಪುರದಲ್ಲಿ ಪ್ರಪ್ರಥಮ ಬಾರಿಗೆ ಖಾರ್ವಿಕೇರಿಯಲ್ಲಿ ಮೂಡಲು ಆರಂಭವಾಯಿತು. ಆಧ್ಯಾತ್ಮಿಕ ಕ್ಷೇತ್ರದ ದಿವ್ಯಾನುಭೂತಿ ಖಾರ್ವಿಕೇರಿ ಪರಿಸರದಲ್ಲಿ ಪ್ರಬಲವಾಗಿ ಹರಡಿ ಅಯ್ಯಪ್ಪ ಸ್ವಾಮಿ ಮಾಲೆ ಹಾಕುವವರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಹೋಯಿತು.

ಖಾರ್ವಿಕೇರಿ ಪ್ರದೇಶದ ಕೆಲವು ಕಡೆ ಚಪ್ಪರ ಹಾಕಿಕೊಂಡು ಅಯ್ಯಪ್ಪ ಭಕ್ತರು ಮಾಲೆ ಧರಿಸಿ ನಿಯಮ ನಿಷ್ಠೆಯಿಂದ ವೃತಾಚಾರಣೆ ಕೈಗೊಂಡು ಶಬರಿಮಲೆ ಯಾತ್ರೆ ಕೈಗೊಳ್ಳುತ್ತಿದ್ದರು.ವಿವಿಧ ಪೂಜೆ ಕಾರ್ಯಗಳು,ಸಾರ್ವಜನಿಕ ಅನ್ನಸಂತರ್ಪಣೆ ಇತ್ಯಾದಿ ಧಾರ್ಮಿಕ ಸೇವಾ ಕಾರ್ಯಕ್ರಮಗಳು ಸಾರ್ವಜನಿಕ ಭಕ್ತಾಧಿಗಳ ಸಹಯೋಗದಲ್ಲಿ ಅಯ್ಯಪ್ಪ ಮಾಲಾಧಾರಿಗಳು ಶ್ರದ್ಧೆ ಭಕ್ತಿಯಿಂದ ನಡೆಸಿಕೊಂಡು ಬರುತ್ತಿದ್ದರು.ಅಯ್ಯಪ್ಪ ವೃತಾಚಾರಣೆಯ ಕಾಲದಲ್ಲಿ ಖಾರ್ವಿಕೇರಿ ಪರಿಸರವು ಧಾರ್ಮಿಕ ಪವಿತ್ರ ಸೊಗಡಿನಿಂದ ಕಂಗೊಳಿಸುತ್ತಿತ್ತು.ಇದೇ ಸಮಯದಲ್ಲಿ ಮದ್ದುಗುಡ್ಡೆ ಪರಿಸರದಲ್ಲೂ ಕೂಡಾ ಅಯ್ಯಪ್ಪ ವೃತಾಚಾರಣೆ,ಶಬರಿಮಲೆ ಯಾತ್ರೆ ಸಾಂಗವಾಗಿ ನಡೆದುಕೊಂಡು ಬಂತು.ಶಬರಿಮಲೆ ಯಾತ್ರೆ ವೃತಾಚಾರಣೆಯ ಪರಿಣಾಮವಾಗಿ ಹಲವರು ದುಶ್ಚಟಗಳಿಂದ ವಿಮುಕ್ತರಾಗಿ ಒಳ್ಳೆಯ ಸಂಸ್ಕಾರ ರೂಪಿಸಿಕೊಂಡ ಉದಾಹರಣೆಗಳು ಉಂಟು.ಖಾರ್ವಿಕೇರಿ ಪರಿಸರದಲ್ಲಿ 1978 ರಲ್ಲಿ ಮೊತ್ತ ಮೊದಲ ಬಾರಿಗೆ ಬಾಳೆಹೊನ್ನೂರು ಶ್ರೀಧರ ಆಚಾರ್ಯ ಗುರುಸ್ವಾಮಿಗಳು ಅಯ್ಯಪ್ಪ ವೃತಾಚಾರಣೆಗೆ ನಾಂದಿ ಹಾಡಿದರು. ವಿಠ್ಠಲ ಗುರುಸ್ವಾಮಿಯವರಿಗೆ ಪ್ರಥಮವಾಗಿ ದೀಕ್ಷೆ ನೀಡಿದರು. ಅವರಿಂದ ದೀಕ್ಷೆ ತೆಗೆದುಕೊಂಡ ವಿಠ್ಠಲ ಗುರುಸ್ವಾಮಿಯವರು ಖಾರ್ವಿಕೇರಿ ಪರಿಸರದಲ್ಲಿ ಅಯ್ಯಪ್ಪ ಆರಾಧನೆ, ಶಬರಿಮಲೆ ಯಾತ್ರೆ ದೃಡವಾಗಿ ಬೇರೂರಲು ಕಾರಣೀಕರ್ತರಾದರು. ವಿಠ್ಠಲ ಗುರುಸ್ವಾಮಿಯವರು ಹದಿನೆಂಟು ವರ್ಷ ಶಬರಿಮಲೆ ಯಾತ್ರೆ ಪೂರೈಸಿದ ಸವಿನೆನಪಿಗಾಗಿ ಕುಂದಾಪುರದಲ್ಲಿ ವೈಭವದ ಪುರ ಮೆರವಣಿಗೆಯನ್ನು ಹಮ್ಮಿಕೊಂಡಿದ್ದನ್ನು ಇಲ್ಲಿ ಸ್ಮರಿಸಿಕೊಳ್ಳಬಹುದಾಗಿದೆ.