ಅರ್ಚಕರ ಭಾವಭಕ್ತಿಯಲ್ಲಿ ಅಲಂಕೃತಗೊಳ್ಳುವ ಶ್ರೀ ಮಹಾಕಾಳಿ ಅಮ್ಮನವರು

ಇದಾದ ಬಳಿಕ ಕೂಡ್ಲಿ ಶಂಕರ ಮಠದಲ್ಲಿ ಐದು ವರ್ಷಗಳ ಕಾಲ ಗುರುಗಳ ಜೊತೆಗೆ ಸೇವೆ ಸಲ್ಲಿಸಿದ್ದರು. ಕೂಡ್ಲಿ ಮಠದಲ್ಲಿ ಸಲ್ಲಿಸಿದ ಸೇವೆ ಅವರ ಬದುಕಿಗೆ ತಿರುವು ನೀಡಿತು. ಮರವಂತೆಯ ಅರ್ಚಕರೊಬ್ಬರು ನೀಡಿದ ಮಾಹಿತಿಯಂತೆ ಕುಂದಾಪುರ ಖಾರ್ವಿಕೇರಿ ಮಹಾಕಾಳಿ ದೇಗುಲದ ಪೂಜಾ ಕೈಂಕರ್ಯಕ್ಕಾಗಿ ಅರ್ಚಕರೊಬ್ಬರ ಅವಶ್ಯಕತೆ ಇತ್ತು. ಆ ದಿನ ದೇವಸ್ಥಾನ ಬಳಿ ಬಂದಾಗ ಬೀಗ ಹಾಕಿದ ಪ್ರಧಾನ ಬಾಗಿಲಿನಿಂದ ದೀಪಗಳ ಬೆಳಕಿನ ಪ್ರಭೆಯಲ್ಲಿ ಹೊಳೆಯುತ್ತಿದ್ದ ಶ್ರೀ ಮಹಾಕಾಳಿ ಅಮ್ಮನವರ ದಿವ್ಯ ದರುಶನದಿಂದ ಅರ್ಚಕರು ಭಕ್ತಿಭಾವ ಪರವಶರಾದರು. ಅವರ ನರನಾಡಿಗಳಲ್ಲಿ ಪವಿತ್ರ ಭಕ್ತಿಯ ಮಧುರ ಅನೂಭೂತಿ ಸೃಷ್ಟಿಯಾಯಿತು. ತಾಯೇ ನಿನ್ನ ಸೇವೆಗಾಗಿ ನನ್ನನ್ನು ಸಮರ್ಪಿಸಿಕೊಳ್ಳುತ್ತೇನೆ ಎಂಬ ಅರ್ಚಕರ ಭಕ್ತಿಭಾವ ಪರವಶತೆಯ ಅಂತರಂಗದ ಪ್ರಾರ್ಥನೆಗೆ ಶ್ರೀ ಮಹಾಕಾಳಿ ಅಮ್ಮನವರು ಸ್ಪಂದಿಸಿದರು.

ಶಕ್ತಿ ಸ್ವರೂಪಿಣಿ ಶ್ರೀ ಮಹಾಕಾಳಿ ಅಮ್ಮನವರ ದೇಗುಲದಲ್ಲಿ ಅರ್ಚಕರಾಗಿ ನಿಯುಕ್ತಿಗೊಂಡ ಅರ್ಚಕರ ಪೂಜೆಕೈಂಕರ್ಯಗಳು ಭಕ್ತಾದಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ. ಬಹಳ ಮುಖ್ಯವಾಗಿ ದೇವಿಯನ್ನು ಅವರು ಅಲಂಕೃತಗೊಳಿಸುವ ಕಲೆ ಸರ್ವರ ಪ್ರಶಂಸೆಗೆ ಪಾತ್ರವಾಗಿದೆ. ಅರ್ಚಕರು ದೇವಿಯನ್ನು ಅಪೂರ್ವವಾಗಿ ಅಲಂಕಾರ ಮಾಡುವ ಪರಿ ಹೃನ್ಮನ ಸೆಳೆಯುತ್ತದೆ. ಭಕ್ತಾದಿಗಳನ್ನು ಭಕ್ತಿಪರವಶತೆಯ ಲೋಕಕ್ಕೆ ಕೊಂಡೊಯ್ಯುವ ಪವಿತ್ರ ಕ್ಷಣಗಳು ಅನನ್ಯವಾಗಿದೆ. ಅರ್ಚಕರು ಶ್ರೀ ಮಹಾಕಾಳಿ ಅಮ್ಮನವರನ್ನು ಅಲಂಕೃತಗೊಳಿಸಿದ ದೃಶ್ಯ ನೋಡಲೆಂದೇ ಸಹಸ್ರಾರು ಭಕ್ತಾದಿಗಳು ದೇಗುಲಕ್ಕೆ ಆಗಮಿಸುತ್ತಾರೆ ಎಂಬುದು ವಿಶೇಷವಾಗಿದೆ. ನವರಾತ್ರಿಯ ಒಂಬತ್ತು ದಿನಗಳಲ್ಲಿ ಅಮ್ಮನವರಿಗೆ ಅವರು ಮಾಡಿದ್ದ ಅಲಂಕಾರ ಅಮೋಘವಾಗಿತ್ತು.ಇದೀಗ ಶ್ರೀ ಮಹಾಕಾಳಿ ಅಮ್ಮನವರ ಸನ್ನಿಧಿಯಲ್ಲಿ ಮಾರಿಹಬ್ಬದ ಪ್ರಯುಕ್ತ ಎರಡು ದಿನ ಅಮ್ಮನವರನ್ನು ಶೃಂಗರಿಸಿದ ಪರಿ ಪರಮ ಅದ್ಬುತವನ್ನೇ ಸೃಷ್ಟಿಸಿದ್ದವು. ಅದು ಅಂತರಾಷ್ಟ್ರೀಯ ಮಟ್ಟದಲ್ಲಿ ಜನಪ್ರಿಯಗೊಂಡಿದೆ. ಲಕ್ಷಾಂತರ ಭಕ್ತಾದಿಗಳ ಶ್ಲಾಘನೆಗೆ ಪಾತ್ರವಾಗಿದೆ. ಅಮ್ಮನವರಿಗೆ ವಸ್ತ್ರಾಭರಣ ಪುಷ್ಪಗಳನ್ನು ಸಿಂಗಾರಗೊಳಿಸಿದ ಅದ್ಬುತ ಕೈಚಳಕಕ್ಕೆ ಸರ್ವರೂ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.