ಕಂಚುಗೋಡಿನಲ್ಲಿ ಶ್ರೀ ರಾಮ ಮಂದಿರದ ಸುವರ್ಣ ಮಹೋತ್ಸವ “ಸುವರ್ಣ ಸಂಭ್ರಮ – ಸಂತಸ ಸಂಗಮ”

ಸರಿ ಸುಮಾರು ಐವತ್ತು ವರ್ಷಗಳಿಗೆ ಸರಿಯಾಗಿ ಅಂದರೆ 1974 ರಲ್ಲಿ ಕಂಚುಗೋಡು ಗ್ರಾಮದಲ್ಲಿ ಸಮಾನ ಮಾನಸ್ಕರೆಲ್ಲ ಒಂದಾಗಿ ಒಂದು ಯುವಕ ಸಂಘವನ್ನು ಹುಟ್ಟುಹಾಕಿದರು. ಅಲ್ಲಿ ಭವಿತವ್ಯದ ದೂರದೃಷ್ಟಿ ಚಿಂತನೆಯ ಮಹತ್ತರವಾದ ಧೇಯ್ಯೋದ್ದೇಶಗಳಿದ್ದವು. ಈ ಸಂಘವು ಊರಿನಲ್ಲಿ ಹಲವಾರು ಸಾಮಾಜಿಕ ಮತ್ತು ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ತನ್ನನ್ನು ತೊಡಗಿಸಿಕೊಂಡು ಚೇತೋಹಾರಿ ಕೈಂಕರ್ಯದಲ್ಲಿ ವಿಧೇಯಿಸಿಕೊಂಡಿತ್ತು. ಹೊಸ ತಲೆಮಾರಿನ ಯುವಕರು ಈ ಸಂಘಕ್ಕೆ ಬೆನ್ನುಲುಬಾಗಿ ನಿಂತುಕೊಂಡು ಸಕ್ರಿಯವಾಗಿ ಸೇವೆ ಸಲ್ಲಿಸುತ್ತಿದ್ದರು. ಪ್ರತಿ ಏಕಾದಶಿಯಂದು ಶ್ರೀ ರಾಮನ ಭಾವಚಿತ್ರವನ್ನು ಇಟ್ಟು ಭಜನೆ ಮಾಡುವ ಪರಿಪಾಠ ನಿರಂತರವಾಗಿ ನಡೆದುಕೊಂಡು ಬಂತು. ಕಾಲಕ್ರಮೇಣ ಊರವರು ಸದ್ಭಕ್ತರ, ದಾನಿಗಳ ನೆರವಿನಿಂದ ಹಂಚಿನ ಮಾಡಿನ ಶ್ರೀ ರಾಮಮಂದಿರ ನಿರ್ಮಾಣ ಮಾಡಿದರು ರಾಮಮಂದಿರ ನಿರ್ಮಾಣವಾದ ದಶಮಾನೋತ್ಸವದ ಶುಭ ಗಳಿಗೆಯಲ್ಲಿ ನೂತನ ಮುಖ ಮಂಟಪವನ್ನು ನಿರ್ಮಿಸಲಾಯಿತು. ಪರಮಪೂಜ್ಯ ಶ್ರೀ ಬಾಳೆಕುದ್ರು ಮಠಾಧೀಶರ ಅಮೃತ ಹಸ್ತದಿಂದ ಈ ಮುಖ ಮಂಟಪವನ್ನು ಉದ್ಘಾಟಿಸಲಾಯಿತು. ಅನಾದಿಕಾಲದಿಂದಲೂ ನಡೆದುಕೊಂಡು ಬಂದ ಏಕಾದಶಿ ಭಜನಾ ಕಾರ್ಯಕ್ರಮವಲ್ಲದೇ ವಾರ್ಷಿಕ ಭಜನಾ ಸಪ್ತಾಹ ಕೂಡಾ ಯಶಸ್ವಿಯಾಗಿ ನಡೆಸಿಕೊಂಡು ಬರಲಾಗಿದೆ. ಊರ ಪರವೂರ ಹಲವು ಭಜನಾ ಮಂಡಳಿಯವರು ಈ ವಾರ್ಷಿಕ ಭಜನಾ ಸಪ್ತಾಹದಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಕಾಲಕ್ರಮೇಣ ಹಿರಿಯರು ನೂತನವಾಗಿ ದೇವಸ್ಥಾನ ನಿರ್ಮಾಣದ ಚಿಂತನೆ ಮಾಡಿರುತ್ತಾರೆ. ಆದರೆ ಮೀನುಗಾರಿಕಾ ಆದಾಯದ ಕೊರತೆ ಹಾಗೂ ದೇವಸ್ಥಾನಕ್ಕೆ ಯಾವುದೇ ಆದಾಯದ ಮೂಲ ಇಲ್ಲದಿರುವುದರಿಂದ ದೇವಸ್ಥಾನದ ನಿರ್ಮಾಣ ಕಷ್ಟ ಸಾಧ್ಯವಾಯಿತು. ತದನಂತರ ಈ ವಿಚಾರವನ್ನು ಮನಗಂಡಂತಹ ಹೊಸ ತಲೆಮಾರಿನ ತರುಣರು ಮತ್ತು ಸಮಸ್ತ ಭಕ್ತಾಧಿಗಳ ಸಹಕಾರದೊಂದಿಗೆ 2003 ರಲ್ಲಿ ನೂತನ ದೇವಸ್ಥಾನಕ್ಕೆ ಶಿಲಾನ್ಯಾಸ ನೆರವೇರಿಸಲ್ಪಟ್ಟು, 2006ರ ಶುಭಕುಂಭ ಲಗ್ನ ಸುಮುಹೂರ್ತದಲ್ಲಿ ದಕ್ಷಿಣಾಮ್ನಯ ಶೃಂಗೇರಿ ಶಾರದ ಪೀಠದ ಜಗದ್ಗುರು ಶ್ರೀ ಶ್ರೀ ಭಾರತೀ ತೀರ್ಥ ಮಹಾಸ್ವಾಮಿಗಳವರ ಅಮೃತಮಯ ಹಸ್ತದಿಂದ ನೆರವೇರಲ್ಪಟ್ಟು, ಭಕ್ತ ಜನರ ಕನಸು ನನಸಾಯಿತು.